Тренерот на Челзи, Антонио Конте, во пресрет на вечерашниот натпревар против Барселона во нокаут фазата од Лигата на шампионите, вели дека неговиот тим ќе се обиде да ги искористи слабите страни на Каталонците.
Челзи вечерва на својот „Стемфорд Бриџ“ со почеток од 20:45 часот ќе ја пречека екипата на Барселона, за која Антонио Конте вели дека е „можеби и фаворит за титула“, како и еден од најдобрите тимови на светот.
Станува збор за првиот натпревар од осминафиналето во најелитното европско клупско натпреварување.
„Имаме одлична прилика, да одиграме важен натпревар против врвен ривал и да покажеме на кое ниво всушност се наоѓаме. Мораме да тежнееме кон совршена партија против специфичен тим, кој игра фантастично со топка во свој посед, но тим кој исто така има и слаби страни во игра без топка. Ние ќе пробаме тоа да го искористиме“, изјави Конте.
Тој не зборуваше на опасноста која се заканува од Лионел Меси, петкратниот освојувач на Златна топка, кој, интересно, на осум натпревари против Челзи нема постигнато ниту еден погодок, иако поминал на теренот 655 минути и упатил 29 удари кон голот.
„Се надевам дека традицијата ќе продолжи. Зборуваме за неверојатен фудбалер, кој мораме да го почитуваме. Ќе се обидеме да го спречиме со тимска работа, бидејќи би било опасно да одредиме само еден играч и да му дадеме задолжение да го маркира само него“, истакнува Конте.
Челзи после кризен период успеа до некаде да ја подигне својата форма, со победите против ВБА од 3:0 во Премиер лигата и над Хал со 4:0 во ФА купот.
Преостанатите три претставници на Англија во Лигата на шампионите своите натпревари ги одиграа минатата недела, а останува уште Манчестер Јунајтед кој својот натпревар против Севиља на гости го игра утре.