Интер вечер има тешка задача, брка негатива против Јувентус во Копа Италија, но на гостински терен.
Реванш натпреварот од борбата за место во финалето од овогодинешното издание на Копа Италија се игра вечерва во Торино каде на „Алианц“ стадионот од 20:45 се среќаваат Јувентус и Интер, а „Старата дама“ има предност од 2:1 од првиот натпревар во Милано одигран пред точно една недела.
Антонио Конте е свесен дека Интер вечерва ќе биде на танталови маки, но за разлика од Тантал, маките на Интер е возможно да завршат со позитива.
„Независно од победа, кој и да го носи овој дрес има обврска да ги направи навивачите горди, тоа секогаш мора да биде наша мисија. Најдобриот начин да се убедат играчите да победат и да минат во наредната фаза е низ напорна работа и подготовка за натпреварот на вистинскиот начин, како што направивме и ние“, вели Конте.
„Мора да излеземе на терен и да одиграме со желба и одлучност, како што покажавме во претходните два натпревара. Треба да бидеме похрабри, да го надоградиме она што се случи на последните натпревари и да се обидеме да бидеме перфектни бидејќи за да се победи Јувентус мора да одиграте партија која ќе се граничи со перфекција“.
Натпреварот се игра без публика, а ќе го суди Маурицио Мариани. Победникот ќе игра во финале против подобриот од второто полуфинале во кое утре ќе се сретнат Аталанта - Наполи.
