Уште од 1995 година, кога беше отворен аеродромот во Денвер, околу него кружат теории на завера дека под него се крие таен бункер. Од година во година приказните околу аеродромот стануваат побизарни, а јавноста изгледа како да се забавува со овие „реални“ приказни.
Кога пристигнувате на аеродромот ве пречекува масивна статуа од бесен) коњ, Blue Mustang (кого теоретичарите на заговор го нарекуваат „Blucifer“, а приказната околу неа станува уште повеќе морничава кога скулпторот Луј Хименез почина во 2006 година, откако падна од неа и ја пресече артеријата на ногата.
Внатре во терминалот продолжува истата иконографија – војни, апокалипса, религија и сите останати работи кои ќе ви предизвикаат страв.
Аеродромот кој се наоѓа на 40 километри оддалеченост од Денвер е огромен, а неговата изградба чинеше 2 милијарди долари. Пред неговата изградба Денвер го имаше аеродромот Стејплтон, и токму затоа на никого не му беше јасно зошто беше изграден нов аеродром кога постои совршено добар аеродром во таа околина. Ова само ги подгреа гласините дека под новиот аеродром се крие бункер за илуминатите.
Вработените на аеродромот уживаат во лудите теории, па затоа многу често на прашања како „Што се наоѓа зад овие ѕидови?“ и „Дали навистина има бункер под аеродромот?“ одговараат со „Да, чуваме тајни“.
Без разлика дали под аеродромот навистина се кријат тајни простории на илуминатите или пак сѐ е само добро смислена кампања, Интернационалниот аеродром во Денвер секоја година бележи пораст на туристи, но и пораст на летови.