Долниот дом на Полска вчера усвои закон на предлог на владејачката националистичка партија Право и правда (PiS), со кој се зголемува владината контрола врз училиштата, а критичарите велат дека може да го ограничи пристапот до учење за ЛГБТ заедницата и репродуктивните права.
Предлог-законот беше усвоен со 227 гласа „за“ и 214 гласа „против“, а сега се чека одлуката на Сенатот. Партијата PiS верува дека треба да се воведат промени за заштита на децата, но опозицијата вели дека законот е дел од поголем план за отстранување на либералните вредности од јавниот живот.
Тие предупредуваат дека законот може да ги ограничи правата на родителите да одлучуваат за образованието на нивните деца, а училишната управа нема да може да преземе ништо за тоа. Доколку законот стапи на сила, воннаставните активности што ги одржуваат невладините организации во училиштата ќе бидат можни само доколку бидат одобрени од владин инспектор. Со овој закон ќе се олесни и разрешувањето на директорите на училиштата.
Министерот за образование Пжемисуав Чарнек рече дека инспекторите треба да имаат право да ги прекинат програмите што можат да го „загрозат моралот на децата“, особено кога станува збор за сексуално образование.
„Министерот работи на политизација на училиштата во Полска“
Левичарската пратеничка Агњешка Џемјанович-Бонк на Twitter напиша дека министерот Чарнек работи на „политизирање на училиштата во Полска“ наместо да се занимава со проблемот со депресијата и екстремната сиромаштија кај полските деца.
Откако дојде на власт во 2015 година, националистичката влада воведе серија образовни реформи насочени кон одбрана на традиционалните христијански вредности и да ги научи децата на националната гордост и историјата на Полска.
Законот се соочува со отфрлање во Сенатот во кој доминира опозицијата и во тој случај тој ќе се врати во Долниот дом на парламентот, каде што ќе се одржи уште едно гласање. Доколку повторно биде избран, за законот директно ќе одлучува претседателот Анджеј Дуда, партнер на PiS. Советникот на Дуда во четвртокот рече дека претседателот наскоро ќе се состане со министерот Чарнек за да разговара за ова прашање.