Португалската ѕвезда Кристијано Роналдо уште еднаш на најдобар начин им одговори на критичарите со два гола кои му донесеа победа на Реал Мадрид против ПСЖ, но многу внимание привлече неговиот контроверзно изведен пенал.
Роналдо со пеналот во последните моменти од првиот дел го израмни резултатот на 1:1.
Имено, Кристијано Роналдо се залета за да го изведе пеналот, а топката сама потскокна во моментот пред тој да ја шутне, по што таа се заби во долниот десен агол на голманот Ареола.
Веднаш по изведувањето на пеналот некои од луѓето кои внимателно го следеа натпреварот искажаа мислење дека Роналдо двапати ја допрел топката, поради што судијата требало да поништи голот и пеналот повторно да биде изведен.
Сепак, на забавената снимка јасно се гледа дека Роналдо не ја допира топката двапати, туку таа самата се подига кога Роналдо ја поставува левата нога покрај неа.
„Неверојатно! Кога првпат го видов пеналот, мислев дека тој треба да се шутира одново бидејќи Роналдо ја допре топката двапати. Но, сега кога ја видов снимката повторно се уверив дека топката сама потскокна. Неверојатно е колку е прецизен Роналдо, дури и кога топката ќе се помрдне“, рече прославениот англиски поранешен фудбалер, Мајкл Овен.
Кристијано Роналдо постави уште еден рекорд во Лигата на шампионите и покажа дека ова е негово натпреварување. Тој стана првиот и единствен играч во историјата на натпреварувањето кој постигнал 100 голови во дресот на еден клуб. Двата гола во вчерашниот натпревар го донесоа Роналдо до бројката од 101 погодок во елитното натпреварување.
