Некои од вработените во шведската Агенција за јавно здравје, кои се одлучија за контроверзниот „шведски модел“ на борба против COVID-19, добија закани по живот.
Тие добија полициска заштита, соопшти денеска шефот на агенцијата, објави Reuters.
Шведскиот одговор на пандемијата беше различен од пристапот на повеќето земји во светот, бидејќи социјалното дистанцирање и маските не беа задолжителни, туку сè беше на доброволна основа.
Во земјата досега починаа повеќе од 12.500 луѓе, а бројот на смртни случаи по глава на жител е поголем отколку во соседните нордиски земји, но помал отколку во западноевропските земји, кои имаа строги рестриктивни мерки.
Високата стапка на смртност предизвика жестока дебата околу тоа дали властите треба да воведат поостри мерки, со водечкиот епидемиолог Андерс Тегнел во центарот на вниманието.
„Ова отиде предалеку, дека имаме и смртни закани, кои сега ги испитува полицијата“, изјави шефот на агенцијата за јавно здравје, Јохан Карлсон, за агенцијата ТТ.
„Заканите се насочени кон истакнати луѓе, а во меѓувреме бројот на заканувачки пораки е зголемен. Стигнуваат секој ден. Имаме луѓе што ги чува полицијата“, додаде тој.
