Аргентинците сметаат дека беа оштетени за два пенала во натпреварот со домаќинот на Копа Америка што го изгубија со 2:0.
Според капитенот на аргентинската репрезентација, Лионел Меси, виновни се судиите и семоќноста на Бразил во Јужноамериканската фудбалска конфедерација CONMEBOL.
Аргентина бараше два пенала, но еквадорскиот судија Роди Замбрано не само што не ги досуди, туку и не се консултираше со ВАР по стартовите на Алвес и Артуро врз Агуеро, односно Отаменди.
Спорните ситуации може да ги погледнете ОВДЕ и ОВДЕ.
Сега, CONMEBOL сама потврди дека системот ВАР не функционирал некое време и дека дефектот се случил непосредно пред почетокот на натпреварот. Од конфедерацијата тврдат дека тоа не влијаело врз неговото користење за време на средбата.
Бразилскиот портал Globo излезе со теорија дека припадниците на обезбедувањето на бразилскиот претседател Жаир Болсонаро, кој беше присутен на натпреварот во Бело Оризонте, ја користеле истата фрекфенција како и судиската екипа.
„Се надевам дека CONMEBOL ќе преземе нешто. Ама мислам дека нема, бидејќи Бразил контролира сѐ. Многу е комплицирано“, рече Меси по натпреварот.
Организацијата на Копа Америка тврди дека претседателското обезбедување не ја користело истата фреквенција како и судиите на терен, но потврди дека имало прекини во сигналот што веднаш биле санирани.
