Додека целиот свет уште ги чувствува последиците од застојот предизвикан од пандемијата со COVID-19, групацијата Alibaba го претстави пилот-проектот за паметна фабрика во кинескиот град Хангџоу.
Проектот е дел од иницијативата за „паметно производство“ и се надоврзува на напорите на кинеските онлајн трговци да воспостават што е можно потесна соработка со домашните производители.
Оваа најава го означува ширењето на Alibaba и на секторите за производство, што е надвор од нејзиното делување во е-трговијата.
Во соопштението на кинескиот гигант во е-трговијата се наведува дека со фабриката ќе управува интерното одделение Xunxi Digital Technology Company, а во првата фаза ќе соработува најнапред со производители на облека.
Најавувајќи го пилот-проектот за паметната фабрика, од Alibaba објаснија дека ќе ги искористат податоците што ги собираат во интернет трговијата, пребарување и продажба за да им помогнат на брендовите да предвидат кои производи ќе бидат популарни и на тој начин самите што е можно побрзо да им ги пласираат на пазарот.
Основачот на Alibaba, Џек Ма, во 2016 година го идентификуваше „новото производство“ како еден од петте трендови кои ги нарече идни бизнис можности на групацијата, покрај „новата малопродажба“, „новите технологии“, „новите финансии“ и „новите енергии“.
Ширењето на производството временски се поклопи со обидите на кинеските интернет трговци да воспостават потесна соработка со домашните производители.
Најголемиот конкурент на Alibaba – Pinduoduo – може да го припише својот подем во малопродажбата во домашниот сектор токму на поттикнувањето на производителите да ги продаваат своите производи директно на потрошувачите.