Корона вирусот што првпат беше регистриран во кинескиот град Вухан, од кој починаа веќе 25 луѓе, многу полесно се пренесува од човек на човек отколку што претходно се предвидуваше, изјави Дејвид Хејман од Светска здравствена организација (СЗО).
Досега од коронавирусот заразени се повеќе од 700 луѓе.
– Сега веќе гледаме ширење на втората и третата генерација, посочи Хејман.
Пренесувањето на трета генерација значи дека некој што бил инфициран додека работел со животните на пазарот во Вухан, вирусот го пренел на друго лице, кое пак заразил трет човек.
Првенствено се мислеше дека коронавирусот се шири само преку многу близок контакт, како прегратка, бакнување или користење на заеднички прибор за јадење.
– Се собираат докази дека вирусот може да се шири и на далечина, на пример ако заразено лице кивне или кашла пред друг човек. Засега немаме докази дека вирусот се шири преку воздух како грипот, посочи Хејман.
Британскиот министер за здравство Мет Хенкок денеска оцени дека бројот на случаи на новиот коронавирус веројатно ќе биде многу поголем од досега потврдените.
– Сите жртви досега беа од континентална Кина. Меѓутоа, ова е ситуација која брзо се развива и бројот на смртни случаи и на заболени веројатно ќе биде поголем од досега потврдените, истакна Хенкок во британскиот Парламент.
Тој потсети дека засега мал број заболени има во други држави, меѓу кои и Тајланд, Јапонија, Јужна Кореја, Тајван и САД.
– Засега нема потврдени случаи од оваа нова инфекција во Велика Британија, истакна Хенкок.
Кина денеска затвори два града, кои се епицентар на новата епидемија на коронавирус, од кој починаа 17 луѓе, а заразени се близу 600. Затворањето на градовите значи и запирање на јавниот транспорт, вклучувајќи железници и аеродроми.
Два кинески патници се сместени во болницата во Шкотска со слични симптоми. Се верува дека тие пристигнале од градот Вухан од каде што и се шири епидемијата.
Коронавирусот потврден уште во три држави
Случаи на заразени лица од новиот корона вирус пријавени се во Виетнам, Сингапур и Саудиска Арабија.
Виетнамското Министерство за здравство соопшти дека двајца кинески државјани биле позитивни на тестирањето за корона вирус, но тие се наоѓаат во добра здравствена состојба.
Како што се наведува, таткото и синот кои се вчера хоспитализирани бидејќи имале симптоми на грип, пристигнале од кинескиот град Вухан, каде вирусот првпат е идентификуван.
Сингапур, исто така, го потврди првиот случај на корона вирус на своја територија. Според Министерството за здравство на таа земја, станува збор за 66-годишен маж од Кина кој со семејството на 20 јануари допатувал од градот Вухан во Сингапур и моментно се наоѓа во болнички карантин.
Еден од неговите сопатници, исто така, е хоспитализиран, а во болница се наоѓа и една 53-годишна жена, кинеска државјанка од Вухан, која е позитивна на вирусот. Сите тројца пациенти се во стабилна состојба.
Една медицинска сестра од Индија, која работи во болница во Саудиска Арабија, е заразена со корона вирусот, потврди индиското Министерство за надворешни работи. Тестирани се околу 100 индиски медицински сестри, главно од Керала, и засега не се регистрирани други случаи на заразени лица, се наведува во соопштението.