Бразил за првпат забележа повеќе од 4.000 смртни случаи поврзани со коронавирус во 24 часа, додека уште позаразната варијанта на вирусот поттикна зголемување на бројот на заразени, објави BBC.
Земјата е завиена во црно - болниците се преплавени со пациенти, луѓето во некои градови умираат додека чекаат лекување. Вкупниот број на смртни случаи во земјата досега е скоро 337.000. Само САД имаат поголем број на жртви. Здравствениот систем во Бразил - земја со 210 милиони жители – пропаѓа или е пред колапс во многу области.
Но, претседателот Жаир Болсонаро продолжува да се спротивставува на воведување какви било мерки за контрола на инфекцијата.
Тој тврди дека штетата врз економијата би била дури и полоша од влијанието на самиот вирус и се обиде да укине некои мерки преземени од локалните власти во судовите.
Зборувајќи пред приврзаниците пред претседателската резиденција во вторникот, тој ги критикуваше мерките за карантин, велејќи дека тие се поврзани со зголемување на телесната тежина и депресија и водат кон невработеност. Не даде коментар за бројот на жртвите.
Досега во Бразил евидентирани се над 13 милиони случаи на коронавирус, соопшти Министерството за здравство. Околу 66.570 луѓе починаа во март како последица од COVID-19, двојно повеќе од минатиот месец.
