Научниците открија дека коронавирусот SARS-CoV-2 кој ја предизвикува болеста COVID-19, може да преживее на стакло, хартија и нерѓосувачки челик подолго отколку што се мислеше досега.
Коронавирусот уште е опасен откако ќе остане на површини како што се банкноти, екрани на телефони и нерѓосувачки челик и до 28 дена, тврдат научниците. Австралиската државна агенција за наука утврди дека ова е подолго задржување на вирусот на овие површини отколку што се сметаше порано.
Вирусот најчесто се пренесува преку капки во воздухот, кога заразени луѓе кашлаат, киваат или зборуваат. Но, некои експерти велат дека може да се пренесе и од честички во воздухот, како и преку допир на површини како метал и пластика на кои паднале капки.
Претходните лабораториски студии покажаа дека коронавирусот може да преживее два до три дена на банкноти и стакло и до шест дена на пластика и челик, но резултатите варираат.
Неодамнешното истражување на австралиската агенција CISRO откри дека вирусот е „многу отпорен“ и може да преживее до 28 дена на мазни површини како стакло на мобилни телефони - кога се чува на температура 20 степени Целзиусови, што е приближно на собна температура.
За споредба, вирусот на грип може да преживее 17 дена под истите услови.
Експериментите биле извршени во темна просторија, бидејќи УВ зраците го убиваат вирусот.
„Ако утврдиме колку долго вирусот преживува на површините, ќе можеме попрецизно да го предвидиме ширењето и подобро да ги заштитиме луѓето“, рече извршниот директор на CISRO, д-р Лери Маршак.
Истражувањето објавено во Virology Journal покажа дека вирусот потешко опстојува на потопли температури - престанува да биде инфективен во рок од 24 часа откако бил изложен на температура од 40 степени Целзиусови.
SARS-CoV-2 првенствено се шири преку воздух. Истражувањата покажаа дека останува инфективен во честичките што се пренесуваат во воздухот повеќе од три часа.
Претходните истражувања на нерѓосувачки челик имаа различни резултати - од три до 14 дена, на собна температура. Новото истражување се занимаваше со прашањето колку долго вирусот може да преживее на стакло, хартија, пластика и челик. Откриено е дека преживува до 28 дена на сите три површини, на температура од 20 степени - значително подолго отколку во претходните студии.
Експериментите, сепак, беа спроведени во услови што му „одговараат“ на вирусот - во затемнета просторија со стабилна температура и влажност - така што вирусот можеби нема да помине „толку добро“ во реални услови во вистинскиот свет.
Овие резултати секако нè потсетуваат на потребата редовно да се мијат рацете, како и да се чистат телефоните и да се избегнува допирање на лицето, со цел да се намали ризикот од инфекција.
Авторите на студијата велат дека можноста вирусот да преживее на нерѓосувачки челик при ладни температури може да објасни како епидемјата на COVID-19 ибувна во индустријата за преработка на месо и во ладилници - илјадници работници се позитивни на коронавирусот низ целиот свет.
Истражувачите на CISRO исто така наведуваат дека нивното истражување ги поддржува претходните кои откриле дека вирусот може да преживее и на свежа и на замрзната храна. Светската здравствена организација вели дека „во моментов нема потврден случај на инфекција преку храна“.