Првата од потребни две победи е извојувана. Македонските кошаркари денеска во Перм успеаја во тешка битка да ги победат „Аѕурите“ и да останат во игра за пласман на ЕвроБаскетот.
Почетокот не навестуваше среќен крај за Македонија бидејќи првата четвртина Италија ја доби со 10 разлика, а потоа на полувреме замина со водство од 52:41.
Пресвртот се случи во третата четвртина кога Македонците одиграа фуриозно и со добра одбрана им дозволија на Италијанците само 13 поени, а 26-те постигнати значеа преземање на водството и со 67:65 се замина на кратка пауза пред последната четвртина во која ја одржавме предноста и со конечно 87:78 го добивме натпреварот.
Најефикасен на паркетот беше Ненад Димитријевиќ со 22 поени кој пред самиот крај го напушти теренот поради повреда на коленото за која засега не се знае дали е сериозна. Андреј Магдевски реализираше 4 тројки и натпреварот го заврши со 20 поени како втор најефикасен. Кај противникот Марко Спису реализираше 17 поени.
Од 16 часот домаќинот на турнирот, Русија, игра против Естонија, а нам ни е потребно Естонците да загубат за утре од 15 часот во директен дуел со нив сами да си ја решиме судбината.
Табела:
- Италија 10 (4-2)
- Русија 8 (3-2)
- Естонија 6 (2-2)
- Македонија 6 (1-4)
Првопласираните три репрезентации ќе се пласираат на ЕвроБаскетот 2022, а Италија и Русија веќе имаат обезбедено учество.