Понекогаш нема доволно зборови да се опише мајчинската љубов, а тоа го докажа и Јелена Брукс, капитенката на женската кошаркарска репрезентација на Србија.
Оваа 30-годишна спортистка пред само три месеци го роди синот Матео, а сега го предводи тимот на Европското првенство во кошарка за жени.
Особено внимание привлече кога по победата над Белгија и пласманот во четвртинафиналето на ова натпреварување, застана пред камерите и даваше интервју со синот во раце.
Присутните новинари и обожавателите беа одушевени, а позитивните реакции продолжуваат да одекнуваат од целиот свет. Видеото со нејзиното интервју стана вирален хит на интернет.
Дури и резултатот на натпреварот падна во втор план кога Брукс почна да одговара на прашањата со бебето во раце.
Како што таа истакна и во претходните интервјуа, Кошаркарскиот сојуз на Србија максимално ѝ излегол во пресрет и ѝ овозможил да биде со бебето за време на подготовките.
„Кога станува збор за репрезентацијата, за мене не постои дилема. Знаев дека летово ќе играм на Европското првенство. Бебето е многу мало и не постоеше опција да се одвојам од него, а луѓето од Сојузот ни овозможија да бидеме заедно за време на подготовките“, изјави Брукс и докажа дека ако се сака и има поддршка, може да се балансираат мајчинските и работните обврски.
Обожавателите побрзаа да го изразат својот восхит кон посветеноста на капитенката кон репрезентацијата, па српските медиуми веќе ја прогласија Брукс за „хероина на ова првенство“ која докажала дека репрезентацијата е вредна за секаква пожртвуваност.
Брукс вложи вонредни напори да се врати во форма по породувањето и да ѝ помогне на Срвија да направи ново чудо, пишува Kurir.
Капитенката нагласи дека ѝ е многу полесно да ги одработува тренинзите кога знае дека синот е покрај неа, па затоа прво со него ја прослави победата.
„По тежок тренинг или натпревар секогаш имам сила кога ќе се вратам и ќе го видам насмеан. Мајчинската љубов е нешто што не може да се опише“, изјави Брукс.