Кошаркарките на Шпанија се нови европски шампионки. Тие во финалето на ја совладаа Франција со 71:55. Шпанките ја освоија третата европска титула во историјата, откако претходно беа најдобри во 1993 и 2013 година.
Шпанските кошаркарки заслужено ја освоија европската титула, бидејќи Французинките им парираа само во првата четвртина.
Токму во финишот на првиот период започна шпанската серија 14:2, за прва двоцифрена предност на натпреварот 32:20.
Франција во вториот период одржуваше негатива од седум до девет поени, а клучниот чекор кон освојување на титулата Шпанија го направи во третиот период, кога за седум минути им дозволи на противничките да постигнат само два поени.
Литл со 19 поени и 9 скокови и Торенс со 18 кошеви ја предводеа Шпанија до европската титула.
Третото место и бронзениот медал им припадна на кошаркарките од Белгија, кои во „малото финале“ ја декласираа Грција со 78:45.
Наредното Европско првенство за кошаркарки ќе се одржи за две години во Летонија и во Србија.
