Уругвај и Јужна Кореја одиграа попладнево нерешено 0:0 во рамки на првото коло во групата Х на Светското првенство во Катар.
Двете репрезентации во првото полувреме имаа по една голема шанса за гол. Јужнокорејскиот напаѓач Хванг за малку биеше непрецизно кон противничкиот гол во 34. минута, додека на спротивната страна топката по ударот со глава на Диего Годин ја погоди стативата во 43. минута. Најзрелата шанса за гол во второто полувреме се случи во 89 минута кога Уругвај вторпат во натпреварот ја погоди стативата по обидот од далечина на Федерико Валверде.
Воведното коло во групата Х ќе биде комплетирано со дуелот меѓу Португалија и Гана со почеток во 17 часот.
Резултатскиот епилог е невозбудлив, но не и составот на јужнокорејската репрезентација, особено за коментаторите. Половина од селекцијата на Јужна Кореја на Светското првенство има исто презиме. Кога се појавија почетните состави за овој дуел, сите забележаа еден детаљ. Има пет играчи со исто презиме - Ким. Сите играат во последниот ред.
Почнувајќи од голманот, па сè до четворицата одбранбени играчи, сите имаат исто презиме. Селекторот Пауло Бенто (Португалија) се одлучи за интересен состав за овој натпревар: Сеунг Ѓу Ким на голот. Лев бек беше Џин-Су Ким, десен бек Мон-Хван Ким. Тандемот на стоперката го сочинуваа Мин-Џае Ким и Јунг-Гвон Ким.
Уругвај на стартот на Мундијалот се обиде да ја избегне судбината на Аргентина и Германија, но помина за нијанса подобро – одигра нерешено. Да потсетиме, Аргентинците загубија од Саудиска Арабија (2:1), додека Јапонија ги изненади Германците (2:1).
