Конфликтот околу Нагорно-Карабах, кој е дел од отцепениот регион Арцах, разгоре до степен на војна, со жртви од двете страни. На Балканот, ваквата ситуација веднаш распламти дискусии околу сличноста со отцепувањето на Косово.
Баку на 27 септември соопшти дека Ерменија фрлила гранати на позиции на азербејџанската војска, а Ереван тврдеше дека азербејџанските вооружени сили тргнале во офанзива кон Нагорно-Карабах. И двете страни пријавија жртви, вклучувајќи и цивили. И Ерменија, и Азербејџан прогласија вонредна состојба и мобилизација на војската.
Иако на прв поглед лесно е да се извлечат одредени паралели меѓу конфликтот во Нагорно-Карабах и Косово, експертите велат дека не е така.
„Сличност може да биде фактот дека и двата конфликта настанаа со распадот на федерални социјалистички земји на крајот на Студената војна. Но, повеќе има разлики отколку сличности“, вели Александар Гајиќ од Институтот за европски студии за BBC на српски јазик.
И ерменскиот претседател Армен Саркисијан лани во октомври при официјалната дводневна посета на Србија, кажа нешто слично.
„Проблемите на Косово и Нагорно-Карабах не се идентични, и двете прашања се многу комплексни и затоа не може механички да се каже дали сте за или против некое решение“, рече тој.
