Косово треба да ја признае Србија, а Србија да го признае Косово како независна држава, изјави косовската министерка за надворешни работи Доника Гервала.
„Дури откако ќе се договориме за тоа, можеме да ги решиме сите други прашања билатерално“, изјави Доника Гервала во интервју за Al-Jazeera Balkans.
Таа додаде дека е многу важно дијалогот да се занимава со суштината, бидејќи „нема потреба да се патува во Брисел“ за ракување и фотографирање.
„Мораме да напредуваме, а тоа е можно само ако сериозно му пристапиме на дијалогот, бидејќи сите, па дури и Србија, знаат дека взаемното признавање е во неговиот центар“, рече таа.
Косовската министерка повтори дека Приштина планира да ја тужи Србија за геноцид пред Меѓународниот суд на правдата, пренесе B92.
„Тоа ќе го направиме откако ќе завршиме со подготовките“, рече таа, додавајќи дека „агресорот треба да ѝ пријде на жртвата и да се извини за извршените злосторства“.
