Денешниот квалификациски дуел на Дрита против Линфилд не се одигра откако тестирањата на косовските фудбалери открија и втор позитивен играч.
Шампионот на Косово, тимот на Дрита од Гнилане, според новите правила се соочува со исфрлање од квалификациите за новата сезона во Лигата на шампиони.
Требаше денеска да игра против Линфилд, шампион на Северна Ирска, во финалето од претквалификациите. Но, позитивниот тест го запали алармот во УЕФА и натпреварот веднаш беше откажан. Требаше да се игра на неутрален терен во Нион каде пред неколку дена се играа и двата полуфинални натпревари.
„Играчот кој беше тестиран позитивен синоќа, претходно имаше негативен тест во петокот како дел од скринингот на УЕФА. Целиот тим на Дрита беше негативен на тестирањето пред да пристигне во Швајцарија“, стои во соопштението на УЕФА.
„Во петокот, друг играч на Дрита беше позитивен во пресрет на нивниот дуел со Ескалдес. Играчот беше ставен во карантин заедно со соиграч со кој се воспостави дека имал близок контакт“.
„Вториот позитивен играч, кој бил во контакт со сите останати изминативе денови, ги натера швајцарските власти да го сместат целиот косовски тим во карантин. Според тоа, натпреварот не може да се одигра“, вели УЕФА.
Многу веројатно е дека Дрита ќе биде исфрлена од квалификациите, а Линфилд ќе биде тимот кој ќе продолжи во 1. коло од квалификациите за Лигата на шампиони и ќе игра против варшавска Легија. Тоа е бидејќи нема време кога да се одигра средбата со оглед на тоа што 1. коло се игра веќе наредните вторник и среда.