Натпреварот од 4. коло во Лигата на нации меѓу Грција и Косово помина со бројни нереди, а на мета беа гостинските навивачи кои пристигнаа на стадионот во Волос.
Грците го совладаа Косово со 2:0 и со тоа на две кола до крајот го обезбедија првото место во групата 2 од Лигата Ц во Лигата на нации. Сепак, натпреварот остана во сенка на немилите настани.
Грците во текот на целиот натпревар извикуваа „Косово е Србија“ и ги навредуваа косовските фудбалери кога и да ја имаа топката. Ова особено се однесува на моментите кога Косовците изведуваа корнери.
Сепак, за да биде работата уште полоша се погрижија домашните навивачи кои фрлаа бакљи кон гостинските навивачи, кои околу 150 беа пристигнати на стадионот „Пантесалико“ во Волос.
Грците фрлаа со бакљи кон гостите, а локалната полиција се погрижи да нема поголема пресметка. Но, кон гостите летаа и камења од грчките навивачи, а за среќа на крајот сѐ помина во најдобар ред без голем број повреди.
Исто така, на стадионот имаше неколку провокативни знамиња, меѓу кои и картата на Србија на која е вклучено и Косово. Жестоко беше исвиркана химната на гостинската репрезентација, која едвај се слушаше од свирежите.
Бидејќи УЕФА не дозволува политички провокации, а особено напади и нереди на трибините, се очекува Грците да бидат најстрого казнети.
Грција не го признава Косово како независна држава, а грчките навивачи одамна се во одлични односи со српските, поради што ваквите сцени и беа очекувани.
Инаку, Грците отпорот на гостите го скршија дури во 71. минута кога погоди резервистот Јоргос Јакумакис, а потоа длабоко во судиското надополнување точка стави Петрос Манталос.
Грција со максимални 12 бода од 4 натпревари е лидер во групата 2 од Лигата Ц во која се натпреварувари и Македонија. Косово има 6 бода и не може да ја престигне Грција бидејќи веќче двапати загуби од нив и со тоа има полош меѓусебен скор. На дното од оваа група се Северна Ирска и Кипар со само 2 бода.
