Во финална фаза е изградбата на зградата за социјално загрозени семејства во Бутел. Премиерот Димитар Ковачевски направи увид во градежните работи за зградата во која вели дека ќе се сместат 312 семејства. По увидот Ковачевски направи споредба на она што го направила Владата на СДСМ со она што го правеше Владата на ВМРО – ДПМНЕ.
„Оваа зграда вреди 10 милиони евра или четири лава кои ги поставуваа на Гоце Делчев, без палми. 4 лава е зграда од 312 стана, тоа е најдобра споредба. Ние не садевме палми во Вардар за стотици илјади евра, не градевме Шпански скали, не правевме фасади од стиропор, не правевме скулптури на бикови и шмизли за десетици милиони евра туку со истите средства изградивме социјална зграда со 312 стана за социјално ранливи категории граѓани. Вложуваме во потребите на граѓаните и тоа многу гордо можеме да го кажеме“, рече премиерот Ковачевски.
Досегашната инвестиција во зградата е 9,8 милиони евра. Има два влеза со приземје и тринаесет ката, а на секој кат има по 24 стана. Има пристап за лица со посебни потреби, а премиерот очекува за неколку месеци да биде распишан оглас за доделување на становите.
Премиерот Ковачевски потсети дека пред само два месеца домови добија социјално загрозени семејства во Гостивар, во февруари распределени беа социјални станови во Свети Николе и во Виница, а пред четири месеци во Пробиштип. Премиерот се пофали дека во изминатите четири години изградени се или се во фаза на изградба повеќе од 860 социјални станови и тоа во Македонски Брод, во Струмица, во Гевгелија Демир Капија, Неготино, Дебар, Велес, Кочани и Сарај.
