Во земјите членки на Европската Унија во јули беше забележано закрепнување на продажбата на автомобили, но КОВИД кризата ги покажа забите во август.
Здружението на европски производители на автомобили (ACEA) денеска соопшти дека во месец август повторно бил забележан пад на продажбата.
Во земјите членки на ЕУ во јули беа продадени 1,073 милиони нови возила, што е за 5,7% помалку во споредба со истиот месец во 2019 година, а сепак тоа беше најдобриот месец во 2020 година.
Автомобилската индустрија годинава се најде во големи проблеми поради пандемијата со COVID-19, од набавка на делови и производство, до дистрибуција и физичка продажба на возила.
ACEA во месечниот извештај наведува дека во јули бил забележан „релативно мал пад“, но во август пазарот на автомобили во ЕУ повторно бил погоден и забележан е голем пад од 18,9%. Тоа сепак беше помалку драматично во споредба со почетокот на годинава, стои во извештајот.
Од ACEA додаваат дека од почетокот на 2020 година продажбата на автомобили ослабела за 32% во споредба со истиот период во 2019 година.
Здружението во јуни годинава прогнозираше пад на годишно ниво од 25%.
Најголем пад се бележи на пазарите во Шпанија и Италија, каде продажбата се намали за околу 40%. Во Франција се купуваа за 32% помалку автомобили, а во Германија беше регистриран пад на продажбата од 28,8 отсто.