Без дури седуммина првотимци кои се наоѓаат во карантин, ПСЖ загуби во својот прв натпревар од новата сезона во француската лига и тоа кај новајлијата Ланс.
Томас Тухел се соочи со куп проблеми пред гостувањето кај Ланс во првиот натпревар на актуелниот француски шампион во новата сезона од Лиг 1.
Дури седум играчи од првата екипа поради позитивен тест на коронавирусот се напоѓаат во самоизолација. И тоа не било кои туку Нејмар, Килјан Мбапе, Анхел Ди Марија, Маркињус, Кејлор Навас, Мауро Икарди и Леандро Паредес.
Со резервисти, двајца 18-годишни младинци и резервен 20-годишен голман, ПСЖ не само што не успеа да постигне гол туку и загуби со минимални 1:0.
Победничкиот гол за домаќините беше дело на младиот камерунски фудбалер Ињатиус Ганаго во 57. минута.
Без разлика на ситуацијата, за Ланс ова секако е голем успех бидејќи дојде до непланирани 3 бода против фаворитот за титулата. Ланс минатата сезона заврши втор во Лиг 2 и поради прекинот на сезоната избори пласман во најдобрата француска лига.
Во Франција веќе почна сезоната и се одиграа две кола пред репрезентативната пауза, но ПСЖ не играше бидејќи доби одмор поради настапот во финалето од Лигата на шампиони.