Судот во Мексико Сити трајно ги забрани борбите со бикови во главниот град, пренесе Le Monde.
На 10 јуни судот донесе целосна забрана на борби со бикови во главниот град на Мексико. Барањето дојде од здружението Justicia Justa повикувајќи се на локалните закони според кои се гарантира „правото на здрава животна средина“ за животните.
„Борбите со бикови се забранети во Мексико Сити. Најголемата арена на суровост во светот е затворена“, објави здружението славејќи ја одлуката на Судот со која се забрануваат борбите со бикови.
Познатиот стадион La Plaza Mexico ги повика навивачите да протестираат против пресудата и да објават свои фотографии со испишани зборови за слобода. Исто така најавија дека ќе поднесат жалба на пресудата, пренесе Associated Press.
„Ќе ги одложиме закажаните борби со бикови и ќе продолжиме со правната одбрана на мексиканските обичаи и традиции во мера во која законот го дозволува тоа“, стои во соопштението на La Plaza Mexico.
Судот веќе ја одби едната жалба на пресудата. Со трајната забрана се означува крај на скоро 500-годишна традиција на борби со бикови во Мексико. Според историчарите, шпанскиот освојувач Ернан Кортес ги гледал првите борби со бикови во 1520.
Од 2013 година четири сојузни држави во Мексико забранија борби со бикови, а анкетите покажуваат значајна поддршка од граѓаните за оваа одлука.
