Јужнокорејскиот електронски гигант LG Electronics соопшти дека нема повеќе да произведува и продава смартфони поради големите загуби со кои се соочи последниве години.
За ваквиот потег се шпекулираше веќе некое време, а компанијата денеска преку бордот на директори и официјално ја потврди стратешката одлука да се запре масовното производство.
Технолошкиот гигант од Јужна Кореја, кој едно време беше трет најголем производител на мобилни на светот, очекува до крајот на јули во целост да го запре производството. Но, некои од неговите телефони би можеле да останат достапни за продажба додека не се потрошат залихите. Од LG уверуваат и дека ќе продолжат да даваат поддршка за постоечките модели во одреден период, во зависност од локациите.
„LG има во план да се фокусира на полињата кои земаат замав како што се делови за електрични автомобили, направи за поврзување, паметни домови, роботика, вештачка интелигенција и бизнис-ту-бизнис решенијата, како и платформи и услуги“, објави компанијата во соопштение. Воедно, ќе продолжи да развива и технологија поврзана со мобилни, како на пример 6G.
Јужнокорејскиот бренд за мобилни се соочи со вртоглави загуби во изминативе пет години, а наводно загубата достигнала неверојатни 4,5 милијарди американски долари. Напуштањето на главниот извор на загубата, производство на телефони, се очекува да го зајакне профитот и кривата повторно да се искачува особено што лани компанијата профитираше 2,85 милијарди долари.
LG во светски рамки учестува со 2% од глобалниот пазар на смартфони, според неодамнешни статистички податоци на Counterpoint. Јужнокорејскиот производител во 2020 година произведе само 24 милиони телефони, додека глобалните лидери како Samsung и Apple произведоа околу 256 милиони, односно 201 милион. Се очекува овие два бренда да ја пополнат празнината што ќе се отвори со прекинот на LG.