Свет

Крај на карантинот: Почна евакуацијата на патници од крузерот што беше одбиен на пет пристаништа

14. февруари 2020 - 8:43 | А.С.

Патниците и членови на екипажот кои беа во карантин на крузерот The Westerdam, чие закотвување го одбија пет азиски и пацифички земји од страв од ширење на вирусот Covid-19, конечно може да излезат од карантин.

На бродот до вчера не му беше дозволено да се закотви на пет пристаништа, иако операторот Holland America Line со седиште во САД, соопшти дека меѓу 1.455 патници и 802 членови на екипажот нема потврдени случаи на корона вирусот.

Според најновите информации, веќе се евакуираат првите патници од крузерот закотвен во Камбоџа кои неколку дена беа во карантин. Се очекува евакуацијата да се одвива во етапи, во зависност од различните распореди на авионски летови.

Операторот соопшти дека крстарењето завршува во Сиханоквил, од каде патниците можат со чартер лет да заминат во главниот град Пном Пен, а оттаму да се вратат во своите домови, за што била добиена согласност од властите на оваа земја.

Крузерот The Westerdam претходно беше одбиен од пристаништа во Тајланд, Филипини, Тајван, Јапонија и Гуам. Крузерот своето патување го почна минатиот месец од Сингапур, а последното застанување му беше во Хонгконг, градот во кој досега се потврдени 50 случаи на Covid-19.

Од друга страна, продолжува карантинот за патниците на крузерот Diamond Princess во Јапонија, каде досега се потврдени 219 случаи на вирусот. Властите соопштија дека се очекува зголемување на бројот на заразени пред истекот на карантинот што предвидено да трае до 19 февруари.

Коментирај