Кошаркарот на Далас Маверикс, Кајри Ирвинг, ја заврши сезоната поради повреда. Ирвинг ги скина предните вкрстени лигаменти на левото колено, изјавија извори за ESPN.
Кајри Ирвинг, кој има 32 години, се повреди во првата четвртина во поразот на Маверикс од Сакраменто Кингс изминатата ноќ.
Одигра само 9 минути и имаше 7 поени во првата четвртина и по 1 скок и асистенција, а кога се повреди беше јасно дека нема да може да продолжи, па со еден потег ги воодушеви сите во салата. Застана на линијата за слободни фрлања, поентираше и замина во соблекувалната.
Ирвинг беше најдобриот играч на тимот, настапи на 50 од 62 натпревари на Далас. Има просек од 20 поени со 40% реализиција во шутот за 3 поени.
Повредата на Ирвинг е уште еден удар за Далас, бидејќи надвор од теренот е и Ентони Дејвис, кој дојде во клубот како дел од трејдот на Лука Дончиќ.
Далас има скор од 32-30 и моментално е на 10-тото место во Западната конференција, последното кое води во плеј-ин.
