Аргентинскиот напаѓач Пауло Дибала заедно со Федерико Бернардески се фотографираше во новиот дрес на Јувентус за следната сезона, а со оглед на тоа дека прв послужи како модел во промоцијата на новиот дрес, се чини дека ги замолчи гласините дека заминува од Торино.
Откако испадна од Лигата на шампиони, Јуве почна со плановите за следната сезона. Со ваквиот потег покажа дека не планира да дозволи Дибала да ја напушти „Старата дама“.
Играта на Аргентинецот во изминатите две сезони е далеку од она што своевремено го правеле поранешните „десетки“ на клубот, кои со своите потези ги решавале најважните натпревари.
Дибала лошо играше на клучните натпревари на Јуве, беше слаб во дуелите и чувањето на топката, а често и го забавуваше темпото на игра.
Италијанските медиуми, водени од ваквиот перформанс, но и имајќи ги предвид расправиите на играчот со тренерот Масимилијано Алегри, веќе го селеа Дибала во некој друг клуб.
„Дибала останува. Тој е играч на Јувентус и очигледно е дека сигурно ќе остане. Ќе имаме вообичаен состанок, како и секој клуб. Имаме идеи за тоа како да го подобриме составот“, рече неодамна спортскиот директор на Јувентус Фабио Паратичи.