Како што тргна летово за Реал Мадрид, составот кој ќе имаат можност да го гледаат навивачите на Сантијано Бернабеу ќе биде многу различен од оној во изминатата сезона. Синоќа „кралевите“ комплетираа уште еден трансфер – клубот го засили Ферланд Менди, кој доаѓа од францускиот Олимпик Лион.
Трансферот синоќа беше потврден од страна на двата клуба, a Ферланд Менди би требало да ги помине медицинските прегледи веќе наредната недела.
Менди е лев бек кој има 24 години и зад себе остава фантастична сезона во дресот на Олимпик Лион. Интересот за него се зголемуваше во текот на сезоната, а селекторот на француската репрезентацијата Дидие Дешамп уште минатата недела најави дека тој ќе се пресели во Мадрид ова лето.
Во Лион пристигна од Ле Авр во 2017 година, а оттогаш одигра 79 натпревари, постигна три гола и забележа седум асистенции. Минатиот ноември дебитираше за француската репрезентација во пријателски натпревар против Уругвај, а потоа имаше уште еден настап за светскиот шампион.
Како најзагрозен од овој трансфер би можел да се чувствува Марсело, кој минатата сезона го загуби загарантираното место во првиот состав, а пред само неколку дена клубот му соопшти дека има слобода самиот да одлучува за неговата иднина во клубот.