Милијардерот Кен Грифин, основач на хеџ фондот Citadel, купи пентхаус на Менхетн за околу 238 милиони долари, што е нова рекордна цена за овој вид недвижнини на њујоршкиот пазар, објави Wall Street Journal.
Грифин го купи станот во зграда во изградба, на адреса Централ Парк Саут 220, објави весникот и додава дека ова е рекорден купопродажен договор и најскапа недвижнина продадена во САД досега.
Грифин, кого го нарекуваат Крал на недвижнините, инвестира во ретки и уникатни парчиња недвижен имот за милионски суми.
Во текстот на Wall Street Journal се нагласува дека само лани купил неколку станови во станбен комплекс во Чикаго за 58,75 милиони долари, што е рекорд за недвижнини во овој град.
Во 2015 година во Мајами купи пентхаус за 60 милиони долари, што е највисока цена платена за еден апартман во тој град и во сојузната американска држава Флорида.
На почетокот на годинава купи куќа во Лондон за 122 милиони долари, пишува Wall Street Journal.
Грифин почнал да се занимава со инвестирање на 19 години кога живеел во студентскиот дом на Универзитетот Харвард.