Веќе одамна се знае дека следната сезона од хит-серијата „Game of Thrones“ ќе биде последна, а фановите тешко го прифаќаат фактот дека нивната омилена серија ќе заврши. Но, можеби последните потврдени вести ќе направат тие полесно да го прифатат крајот.
Според извештаите од Variety, во последната сезона на серијата ќе се случат неколку неочекувани работи, а во последните неколку епизоди ќе биде прикажана и смртта на неколку од главните ликови.
Во Израел се одржа конференција на која беа присутни сите актери, режисери, сценаристи и работници поврзани со „Game of Thrones“. Таму беа презентирани и прочитани сценаријата за последните неколку епизоди, а ова беше првпат актерите да се соочат со она што ги очекува во последната сезона.
Изворот на Variety тврди дека во последната сезона голем дел од омилените ликови ќе умрат или бидат убиени, а ќе се случат и големи промени во тоа како гледачите ги доживуваат ликовите.
„Тоа беше моќен момент за нашите кариери, па дури и за нашите животи. Никој од екипата претходно ги немаше прочитано сценаријата, и затоа еден по друг се изненадуваа кога прочитаа за нивната смрт“, рече Франческа Орси, заменик-претседател на одделот за драма на HBO.
Орси додава и дека откако биле прочитани последните неколку реченици од сценариото за последната епизода, сите присутни станале и им дале 15-минутна овација на Дејвид Бениоф и Д.Б. Вајс, креаторите на серијата.
Уште лани беа најавени спиноф серии со некои од најпопуларните ликови од серијата, а ќе има и неколку серии кои ја објаснуваат историјата на најпознатите семејни лози од „Game of Thrones“.
