Главниот дуо од креативниот тим на популарната серија „Game of Thrones“, составено од Дејвид Бениоф и ДБ Вајс потпишаа договор со кој ќе се приклучат на тимот на „Star Wars“ кој ќе работи на идните проекти од оваа франшиза.
Бениоф и Вајс ќе почнат со работа на новите проекти од „Star Wars“ франшизата откако ќе заврши емитувањето на телевизискиот хит „Game of Thrones“ во 2019 година, најавија од Lucasfilm.
Засега за проектот се знае многу малку, а од Lucasfilm открија дека ќе се работи за филмови кои ќе бидат одвоени од главната приказна на франшизата, како и од најавената трилогија на Рајан Џонсон, со цел да се прошири Star Wars универзумот.
„Во летото 1977 година отпатувавме во галаксија која се наоѓа, далеку, многу далеку, и оттогаш сонуваме за ова“, рекоа во заедничката изјава Дејвид Бениоф и ДБ Вајс.
„Game of Thrones“ се познати по насилството и контроверзните теми кои ги обработуваат, што ги прави драстично поразлични од „Star Wars“ филмовите, кои се наменети за целото семејство. Претседателката на Lucasfilm, Кетлин Кенеди, рече дека Бениоф и Вајс се меѓу најдобрите раскажувачи на приказни во филмскиот и телевизискиот свет, и дека е горда што ќе соработува со нив.
Ова не е првпат дел од тимот на „Game of Thrones“ да соработува со тимот на „Star Wars“. Актерката Гвендолин Кристи ја глумеше Бриен оф Тарт во телевизиската серија, пред да ја преземе улогата на Капетан Фазма во филмовите „The Force Awakens“ и „The Last Jedi“. Нејзината колешка Емилија Кларк ќе има улога во филмот „Solo: A Star Wars Story“.