Кремљ денеска оцени дека планот што минатата недела го предложи Кина за решавање на конфликтот во Украина „заслужува внимание“, но и дека „засега“ не постојат неопходните услови за „мирно“ решение.
„Секој обид што придонесува за насочување на овој конфликт кон мирен пат заслужува внимание. Ние го разгледуваме планот на нашите кинески пријатели со големо внимание“, рече портпаролот на Кремљ, Дмитриј Песков.
„Тоа е долг процес“, рече тој.
„Засега не ги гледаме премисите дека оваа ситуација може да тргне по мирен пат“, додаде тој. „Специјалната воена операција (во Украина) продолжува“, нагласи тој.
Во петокот, точно на првата годишнина од војната, Пекинг објави документ од 12 точки со кој ги повикува Москва и Киев на мировни преговори. Досега Москва и Киев не покажаа сериозна волја за преговори и внимателно реагираа на кинескиот предлог.
Украинскиот претседател Володимир Зеленски оцени дека е „неопходно“ да се „работи“ со Пекинг за да се најде решение за конфликтот. Зеленски рече дека наскоро планира да се сретне со својот кинески колега Си Џинпинг.
Руското Министерство за надворешни работи соопшти дека ги „цени“ напорите на Кина, но и инсистира на признавање на руската анексија на четири украински региони.
