Кремљ во средата соопшти дека мора да се исполнат голем број услови пред да се активира договорот за безбедност во Црното Море договорен со САД, потсетувајќи дека руските барања според претходниот договор за извоз на жито преку Црното Море не се исполнети.
САД постигнаа посебни договори со Украина и со Русија во вторникот за ставање крај на непријателствата во Црното Море и запирање на нападите врз енергетската инфраструктура, а Вашингтон се согласи да изврши притисок за укинување на некои санкции кон Москва.
Кремљ во средата објави дека е задоволен од дијалогот со САД, уверувајќи дека „интензивните“ контакти продолжуваат еден ден по објавувањето на договорот, со помош на Вашингтон, за можен прекин на огнот во Црното Море.
„Задоволни сме од прагматичниот и конструктивен начин на кој се одвива овој дијалог, кој исто така дава резултати“, изјави за новинарите портпаролот на Кремљ, Дмитриј Песков, додавајќи дека „навистина интензивните“ контакти со САД сè уште се во тек.
Тој потврди дека е на сила наредбата на претседателот Владимир Путин за мораториум на нападите врз украинскиот енергетски систем.
Иако рускиот извоз на прехранбени производи и ѓубрива не подлежи на западни санкции, Москва посочува дека ограничувањата на плаќањата, логистиката и осигурувањето претставуваат пречки за нивниот извоз.
Русија сака нејзината државна земјоделска банка, Rosselkhozbank, повторно да се поврзе со меѓународниот платен систем SWIFT. Овој и други чекори најверојатно ќе бараат согласност од европските земји.
„Кога станува збор за Црноморската иницијатива за жито, таа може да се активира откако ќе се исполнат голем број услови“, изјави Песков за новинарите.
„Ова се истите услови кои беа вклучени во (оригиналната) црноморска иницијатива, ... сите услови што се исполнети освен оние кои се однесуваат на руската страна. Затоа, овој пат правдата мора да надвладее и ние ќе продолжиме да работиме со Американците.“
Во 2023 година, Москва се повлече од првичниот договор за извоз на жито преку Црното Море, постигнат со помош на ОН и Турција во 2022 година, тврдејќи дека бариерите за извозот на нејзините прехранбени производи и ѓубрива не се олеснети како што беше ветено во договорот.
