Кремљ во понеделникот соопшти дека врската меѓу Украина и осомничениот напаѓач во обидот за атентат врз поранешниот американски претседател Доналд Трамп покажува дека „играњето со оган“ има последици.
Запрашан за тоа што ФБИ го нарече обид за атентат врз Трамп, портпаролот на Кремљ Дмитриј Песков рече:
„Не треба да размислуваме ние, туку американските разузнавачки служби. Во секој случај, играњето со оган има последици“.
Коментарот се однесуваше на поддршката на Соединетите Американски Држави за Украина во војната против Русија.
CNN, Fox News и New York Times го идентификуваа осомничениот како 58-годишниот Рајан Весли Рут од Хаваи, повикувајќи се на неименувани полициски службеници.
Три профили на социјалните мрежи со името на Рут сугерираат дека тој бил жесток поддржувач на Украина во нејзината војна против Русија.
New York Times објави дека го интервјуирал Рут во 2023 година за напис за Американците кои доброволно се пријавиле да им помогнат на украинските воени напори.
Рут за Times изјави дека отпатувал во Украина и таму поминал неколку месеци во 2022 година и дека се обидувал да регрутира авганистански војници кои избегале од Талибанците за да се борат во Украина.
Во понеделникот, украинскиот претседател Володимир Зеленски го осуди обидот за атентат врз републиканскиот претседателски кандидат Трамп и рече дека политичкото насилство е секогаш неприфатливо.
„Мило ми е што слушнав дека Доналд Трамп е безбеден и неповреден. (Ги испраќам) моите најдобри желби до него и неговото семејство“, рече Зеленски на социјалната платформа X.
