Гол на секои 315 минути, само четири во текот на првата полусезона од шпанското првенство, немоќ во нападот, дали Кристијано Роналдо е минато?
25 додавања, 11 удари, 4 во рамките кон голот, 2 гол прилики, 2 одземени топки, 0 добиени дриблинг дуели, нула голови, нула асистенции.
Така гласи статистиката на Кристијано Роналдо против Виљареал, која можеби е и најдобар приказ за формата во која се наоѓа освојувачот на Златната топка.
Петкратниот најдобар играч на светот, последен пат во 2017 година, не личи на себе оваа сезона. Поретко влегува во шанси за гол, не доминира на теренот како порано, тешко добива дуели, а уште потешко му е постигнувањето на погодоци.
Шеснаесет погодоци (три од пенал) на 24 натпревари за многумина звучи импозантно, но таа статистика е далеку од импресивна, барем не кога е Кристијано Роналдо во прашање.
Кога малку подетално ќе се фрли поглед на неговата статистика, лесно може да се заклучи дека главен показател за формата во која се наоѓа Роналдо е неговата ефикасност во Ла лига, а овде беше стрелец само четири пати оваа сезона на 14 натпревари.
Тоа значи дека тој постигнува погодок на секои 315 минути, што е сепак премногу за него.
Напоредно со тоа, шампионот на Европа Реал Мадрид точно на половина на сезоната има дури 19 поени помалку од лидерот Барселона, која ги покори на „Сантијаго Бернабеу“ пред еден месец.
Колку е Реал лош оваа сезона можеби најдобро зборува фактот дека заостанува цели десет поени зад градскиот ривал Атлетико, кој е далеку од блескава форма.
Според ова, не треба да се биде експерт за да се споредат резултатите на Реал со ефикасноста на Кристијано Роналдо, а бидејќи тоа е период кој трае речиси веќе пет месеци, мора да се постави прашањето – Дали е ова крај на ерата на Кристијано Роналдо?