Најдобриот фудбалер на светот Кристијано Роналдо после дебаклот на Реал на Вембли од Тотенхем со 3:1, ги отфрли тврдењата дека шпанскиот и европскиот шампион и лично тој, се наоѓаат во криза.
Иако според многумина Роналдо игра сезона за заборав и е потполно непрепознатлив во однос на минатите сезони, тој не мисли така.
Португалецот имаше исклучителна сезона лани, во оваа не му оди најдобро бидејќи во првенството не е воопшто ефикасен, па уште во раната фаза од Ла Лига Барселона има предност од осум поени.
Сепак, после поразот од Тотенхем, Роналдо имаше одговор на критиките.
„Криза? Не постои такво нешто. Луѓето брзо ги забораваат добрите работи после само неколку лоши натпревари. Воопшто не заслуживме да загубиме, првиот гол го примивме од офсајд позиција и јас сум мирен. Денес не е важно како играте, туку важни се само бројките. Нема да зборувам за нив, само напишете на Google „Кристијано Роналдо голови“ и се ќе ви стане јасно. Гледајте и уживајте“, порача најдобриот стрелец во историјата на Лигата на шампионите.
Роналдо во синоќашниот пораз на Вембли го постигна својот 112 погодок во ова елитно натпреварување.