Поднесена е кривична пријава против Ј.Л. (41) од Скопје за изработка и поставување на импровизирана бомба од страна на СВР Скопје. Лицето е осомничено поради импровизираната експлозивна направа поставена во Собранието на 27.април.
Според Билтенот на МВР, пријавениот влегол со толпата во Собранието околу 19 часот, а околу 20.40 часот заедно со околу 20 лица се качил на првиот кат од Собранието по што сам влегол во две канцеларии кои се меѓусебно поврзани и поставил импровизирана експлозивна направа под работно биро. Импровизираната експлозивна направа се состоела од петарда и боца со бутан гас залепени со селотејп трака.
Направата не експлодирала, а била откриена од страна на вработените на 2. мај околу 8.25 часот. Направата била пријавена во полиција околу 17 часот од страна на вработен во обезбедувањето на Собранието.