Министерството за труд и социјална политика поднесува 11 кривични пријави за случајот во Заводот за згрижување на деца со воспитно – социјални проблеми и нарушено поведение – Скопје.
„Врз основа на записникот и извештајот од извршениот вонреден инспекциски надзор од страна на Социјалната инспекција, Министерството ќе поднесе кривична пријава до Основното јавно обвинителство против одговорните лица во Центарот за социјална работа – Скопје за ,,несовесно работење во служба’’ , како и против стручни лица вработени во Центарот, за кривично дело ,,запуштање на малолетно лице’’, и за ,,несовесно работење во служба’’, велат од министерството за труд и социјала.
Пријавите се покренуваат против сите лица кои биле задолжени да постапуваат и преземаат службени дејствија во периодот од 2012 – 2017 година, за случајот со 13 годишното девојче кое абортирало откако било силувано и злоупотребувано.
Исто така, од страна на инспекторите се поднесени 12 иницијативи за покренување дисциплинска постапка против стручни лица, согласно со Законот за работни односи. Поведени се и 13 постапки за сторени прекршоци од страна на стручните лица во постапувањето во овој случај, согласно со Законот за социјална заштита, известија од ресорното министерство.