Лошиот влез во новата НБА сезона на Филаделфија 76ерс, кои со скор од 2-11 го заземаат последното место во Источната конференција, но и во целата лига, резултираше со кризен состанок на играчите, на кој од критики не беше поштеден ниту Џоел Ембиид, најкорисниот играч во сезоната 2022/23.
Ембиид бил повикан од неговиот инаку голем пријател Тајрис Макси, кој му рекол дека треба да престане да доцни на сè. Неиграњето на Ембиид, поради повреди, болест и суспензија, е главната причина за лошата форма на тимот. Високиот центар досега се појави на само три натпревари, а новоформираната „голема тројка“, во која покрај Ембиид и Макси се и Пол Џорџ, сè уште нема одиграно ниту еден заеднички натпревар.
„Тајрис го сака дечкото, но ова беше ‘слонот во собата’ и некој мораше да го каже тоа“, изјави извор кој присуствувал на состанокот, а Ембиид наводно ги прифатил критиките.
Ветеранот Кајл Лоури го повика и стручниот штаб предводен од Ник Нурс, велејќи дека треба да бидат построги, особено на тренинзите.
