И германскиот фудбалер застана во низата играчи кои не се согласувата со синоќешната контроверзна одлука Златната топка да му се додели на Лео Меси за година во која имаше најмалку неколкумина кои многу повеќе се истакнаа од него.
Тони Крос зборуваше на својот официјален подкаст каде го коментираше гласањето на France Fotball според кое Меси победи пред Левандовски за 33 гласа.
„Апсолутно е назаслужено. Нема никаква дилема дека Меси, заедно со Кристијано Роналдо, беа најдобрите играчи на последната декада. Но, годинава требаше други да се пред него“, почна тој.
Изненадувачки, Крос вели дека неговиот соиграч Карим Бензема требало да ја добие наградата, не Роберт Левандовски како што мисли најголемиот дел од јавноста и кој, впрочем, заврши втор.
„Според мене, Карим требаше да биде број еден доколку навистина се бараше најдобриот индивидуалец за последнава година, бидејќи одблиску можам да видам каков вонсериски играч е“, рече.
За Крос, и Роналдо постигнал повеќе изминатава година од Меси, иако Португалецот заврши дури шести во гласањето.
„Кога гледам колку решавачки голови постигна Кристијано во последно време - Манчестер Јунајтед само благодарение на него се уште во Лигата на шампионите - тогаш, во моите очи, и Кристијано ќе беше пред Меси“, заврши Крос.
Најголемиот адут на Меси за освојувањето на Златната топка беше освојувањето на Копа Америка со Аргентина, што беше прв трофеј за Меси во националниот дрес.
