Работниците во кинеската фабрика за чевли, сопственост на ќерката на американскиот претседател Доналд Трамп, раскажале за страдањата и за злоупотребите со кои се соочуваат таму, за новинската агенција Associated Press. Тие тврдат дека се жртви на телесно и вербално малтретирање и искористување на работното место.
Особено непријатна ситуација се случила минатиот месец кога една од управничките се изнервирала и удрила со потпетица од чевел еден од работниците, при што му направила дупка на главата.
„Насекаде имаше крв. Поминуваше покрај мене на пат до фабричката клиника. Крвавеше од раната на средина на главата”, рекол еден од работниците.
Сведоци, како примери на злоупотреби, ги навеле преоптовареноста од работа, која траела до доцна во ноќта, ниски плати, жестоко вербално малтретирање па дури и измачувањето на работниците.
Минатиот месец тројца истражувачи од фабриката „Huajian Group“ се уапсени и обвинети за нелегално користење тајни уреди за снимање заради кражба на бизнис податоци.
Основачот на организацијата „Чајна лејбор воч“, Ли Оинг, ја опишува фабриката како „една од најлошите што ги видел во речиси две децении истражување на злоупотребите на работно место”.
Неговата организација објави дека некои од вработените заработуваат само долар на час, што е прекршување и на кинеските закони. До неодамна работниците имале право само на еден или два слободни денови во месецот и биле принудувани да потпишат потврди со лажни, зголемени износи на плати. Ако одбивале, им се заканувале со откази.
„Huajian Group“одбила да одговори на прашањата за деталите тврдејќи дека обвинителите се целосно лажни, извадени од контекст или претерани.
Иванка Трамп не го коментирала случајот, а исто така одбила да даде одговори и нејзината портпаролка.
Американскиот Стејт департмент ја посочи во вторникот Кина како една од земјите со најтешки престапи во трговијата со луѓе и со присилно работење.