Кубарси од Маракана си замина како од војна, со 10 конци

Младиот фудбалер на Барселона, Пау Кубарси, заработи несреќна повреда на синоќешниот дуел против Црвена звезда во Белград.

Иако Барса победи со 5:2, повредата на дефанзивецот Кубарси ги загрижи навивачите на Блауграна.

Имено, по еден дуел во 67. минута, капитенот на Црвена звезда, Урош Спајиќ, ненамерно го удри во лицето 17-годишниот стопер, кој се здоби со расекотина и остана да лежи со крваво лице.

Младиот дефанзивец не можеше да ја продолжи играта, а Барселона по натпреварот на социјалните мрежи објави фотографија од повредениот Кубарси, откривајќи дека младиот играч завршил со десет спојници на лицето и веројатно трајна лузна.

По четири кола Барселона има 9 бода и е на пат да се најде меѓу осумте најдобри екипи кои директно ќе обезбедат пласман во осминафиналето од Лигата на шампионите.