Германскиот овчар Мејџор, сопственост на американскиот претседател Џозеф Бајден и неговата сопруга Џил, повторно касна човек, потврди Мајкл Лароса од Белата куќа.
Немилиот настан се случил на јужниот тревник на Белата куќа во понеделникот вечерта, при што бил повреден вработен во Националниот парк.
– Да, Мејџор гризна човек и тој беше прегледан од Медицинската служба во Белата куќа. Жртвата не е сериозно повредена и се врати на работа, изјави Лароса.
Според него, кучето на претседателскиот пар „сè уште се навикнува на новата средина“. Претседателот на САД и неговата сопруга имаат две овчарски кучиња – Чемп, кое има 13 години и тригодишното куче Мејџор.
Двете кучиња влегоа во Белата куќа неколку дена откако Бајден ја презеде функцијата претседател во јануари. На почетокот на март, откако Мејџор нападна чувар на Белата куќа, кучињата беа испратени во семејната куќа на претседателскиот пар во Делавер. Во Вашингтон се вратија пред една седмица.