Шпанскиот репрезентативец Марк Кукуреља половина година по Европското првенство во Германија призна дека Германците биле оштетени за пенал во четвртфиналето против Црвената фурија.
Шпанците ги совладаа Германците во четвртфиналето на еврото со резултат 2:1 по продолженијата, а мечот можеше да заврши и со поинаков резултат доколку судијата Ентони Тејлор досудеше пенал за Германија во 106. минута од натпреварот.
Мусијала шутираше, а неговиот удар беше блокиран од играчот на Челси со рака, но судијата Тејлор не покажа на белата точка, иако тоа сега го призна и самиот Кукуреља.
„Да се случеше против нас, сигурно ќе протестирав и ќе кажев дека е пенал, но тоа е фудбалот. Си помислив, зае*и, судијата беше блиску до мене и рече дека не е пенал. Топката на Мусијала удри во мојата рака многу јасно и не може да се негира тоа, но мојата рака беше во сосема нормална положба, не можам да ја отсечам“, рече Кукуреља и потоа продолжи:
„Германците мислат дека се елиминирани поради тоа, но остана уште многу време. Можеме да кажеме и дека Тони Крос требаше да биде исклучен. На крајот секогаш сте несреќни кога губите, но тоа е фудбалот и ништо не можете да направите за тоа“, додаде тој.
Да потсетиме, Крос (34) го фаулираше Педри во четвртата минута од четвртфиналниот меч, а тој за тоа не доби ниту жолт картон, иако играчот на Барселона мораше да биде заменет поради повреда.
Потоа во 106. минута Мусијала го удри Кукуреља во рака, а судијата Тејлор и ВАР технологијата не реагираа за во 119. минута Микел Мерино да ги одведе Шпанците во полуфинале, а подоцна и до титулата Европски шампион.
Како и да е, нема сомнеж дека овој детал ќе го прогонува дефанзивецот на Црвената фурија до крајот на неговата кариера.
