Најпознататата графичка новела на сите времиња, „Watchmen“, сега и официјално добива серија на HBO, откако минатата година беше нарачана само пилот епизода. Нејзината премиера се очекува да биде во текот на 2019 година.
Заедно со известувањето дека серијата пристигнува во 2019 година, HBO најави и дел од актерската екипа, меѓу кои е оскаровецот Џереми Ајронс.
Покрај Џереми Ајронс, дел од актерската екипа се и Јахја Абдул-Матин, Аделаиде Клеменс, Френсис Фишер, Дон Џонсон, Тим Блејк Нелсон, Реџина Кинг и многу други. Зад серијата стои Дејмон Линделоф, наградуваниот сценарист кој стана познат по работата на серијата „Lost“, а потоа работеше и на филмовите „Star Trek“ и „World War Z“.
HBO не сакаше да открие околу што ќе се одвива дејството на серијата, туку откри само дека „дејството е сместено во алтернативна историја каде ‘суперхероите’ се третирани како криминалци“. Според најавите, серијата „Watchmen“ ќе ја врати носталгијата за графичката новела од 1986 година, но ќе даде и свој осврт кој полесно би требало да се приспособи кон телевизиските програми во денешно време.
Засега, не се знае како тоа би можело да изгледа. Алан Мур, авторот на „Watchmen“ неколкупати досега изјави дека неговото дело е направено на тој начин што не може да биде екранизирано, бидејќи припаѓа во печатена форма. Досега имаше еден обид вистински да се екранизира „Watchmen“, преку филмот на Зек Снајдер од 2009 година, кој доби мешани критики и брзо беше заборавен.