Дебитантскиот гол во Лигата на шампионите за Дејан Кулушевски вечно ќе стои во неговата меморија, а згора на тоа се работи за гол кој ја донесе победата на неговиот тим.
Јувентус синоќа се намачи со руски Зенит, но успеа да дојде до драгоцени три бода и тоа со гол на четири минути пред крајот. Зенит одолеваше, имаше 0:0 во Сант Петербург и бод в џеб, но тогаш на сцена стапи Кулушевски и го одлучи победникот.
„Сѐ додека сум жив нема да го заборавам овој гол. Тоа е мојот деби гол во Лигата на шампионите, првиот кој го постигнав сезонава, а беше и со глава!“, вели Дејан во изјава за клупскиот ТВ канал.
Македонецот кој настапува за Шведска влезе од клупата за резерви во 58. минута на местото на Федерико Бернардески, а голот му го должи и на Матиа Де Шиљо чие прецизно нафрлување му кумуваше на погодокот.
„Ја видов топката како скривнува на својот пат и се исплашив дека ќе заврши вон голот. Ова е многу важна победа за тимот и воедно важен гол за мене. Влегов од клупата за да направам разлика. На почетоков имав потешкотии, но се обидов да бидам на вистинското место во вистинското време“, додаде тој за Amazon Prime Italia.
„Игравме многу лошо во и првото и во второро полувреме, но силината на тимот е да се победи дури и кога играта е лоша“, заврши Кулушевски.
Со оваа победа Јувентус остана прв на табелата во групата Х каде со максимални 9 бода е пред Челси, Зенит и Малме.
