Реал Мадрид среде Барселона победи со 2:1 во првото сезонско Ел Класико одиграно во десеттото коло од шпанската Ла Лига.
Давид Алаба и Лукас Васкез погодија за мадридскиот клуб, а поразот од Барса го ублажи Серхио Агуеро.
Тренерот на Барселона, Роналд Куман, и понатаму трпи силни критики, а навивачите бараат тој што поскоро да си замине од клупата. Тоа се виде и по натпреварот. Навивачите еден час го чекаа пред стадионот.
Кога конечно излезе неговиот автомобил, навивачите го опколија и се обидоа да се пресметаат со него.
Му викаа да поднесе оставка и да си замине од Барселона, удирајќи го автомобилот во кој беше и неговата сопруга.
Се огласи и Барселона, која го осуди ова однесување на навивачите.
Претседателот на клубот Жоан Лапорта пред Ел Класико изјави дека Барселона ќе го задржи Куман без разлика на резултатот во дербито.