На незгодното гостување во Удине фудбалерите на Милан успеаја да дојдат до трите бода благодарение на атрактивниот гол на Ибра на пред самиот крај.
Златан Ибрахимовиќ повторно е херој на „Росонерите“. Ветеранот одигра нова одлична партија и директно беше инволвиран во двата гола кои му донесоа нова победа на Милан.
Прво во 18. минута Ибра одлично смири една нафрлена топка во домашниот казнен простор, ја загради и потоа му ја сервираше на Франк Кеси кој го отвори резултатот.
Само три минути по паузата Удинезе успеа да дојде до израмнување со гол од белата точка откако Алесандро Ромањоли несмасно го фаулираше Игнасио Пусето во шестнаесетникот, а Родриго Де Паул успешно го совлада Џиџи Донарума.
На седум минути пред крајот Ибрахимовиќ со кунг-фу потег го постигна победничкиот гол иако при ударот со копачката по глава го зафати и противнички играч Родригу Бесау, но голот беше признат.
Кај домаќините нашиот Илија Несторовски преседа на клупата за резерви.
Милан сега има 16 бодови и дефинитивно останува на првото место на табелата со 5 победи, 1 нерешен и без пораз, додека Удинезе останува во зоната за испаѓање со само 3 бода. 39-годишниот Ибрахимовиќ со 7 голови води на листата на стрелци.
