За прв пат на финалниот натпревар се пласираа екипи кои досега никогаш не се нашле во ситуација да играат натпревар за титула. Воедно, за прв пат Тиквеш и Воска Спорт преку овој натпревар ќе имаат шанса да излезат во Европа, поточно во квалификациите за Конференциската лига на УЕФА.
„Финалето на Купот на Македонија е нешто посебно, битката за пехарот несомнено е дека ќе биде спектакл. Тиквеш и Воска Спорт апсолутно заслужено се најдоа во финалето. Со своите настапи во досегашниот дел од ова натпреварување покажаа најмногу, ги минаа сите пречки, покажаа квалитет и сега ќе бијат битка за пехарот, но и за пласман во Европа“, велат од ФФМ.
Федерацијата денеска ги пуштри во продажба картите за големото куп финале. Може да се купат по цена од симболични 200 денари преку продажната мрежа на МКТickets. На денот на натпреварот билети ќе може да се купат и на билетарницата на Националната арена „Тодор Проески“.
ФФМ информнира дека во Кавадарци поддржувачите на Тиквеш можат да купат билети во „Street Café“, додека поддржувачите на Воска Спорт билетите во Охрид може да ги набават во Т.А. „Вис Пој“.
Кавадарчани веќе најавија дека ќе има инвазија на главниот град, а се организира и навивачката група Лозари.
И во таборот на охриѓани се организираат. Клубот најави бесплатен превоз и билети за сите поддржувачи.
Натпреварот в среда почнува во 19:00 часот на Националната арена „Тодор Проески“ во Скопје, каде Тиквеш и Воска Спорт ќе се соочат во финалето на 32. сезона на Купот на Македонија.
Судите се веќе познати. ФФМ за главен судија го назначи Александар Ставрев од Скопје, а ќе му помагаат Дејан Костадинов (Скопје) и Куштрим Лика (Кичево), додека четврти судија ќе биде Јован Качевски од Струга.
Во вторник со почеток во 12:00 часот во прес-салата на Арената официјална прес-конференција ќе одржат двата клуба. Како претставници на Тиквеш ќе бидат тренерот Ѓорѓи Мојсов и капитенот Александар Вареловски, а во име на Воска Спорт ќе бидат тренерот Срѓан Захариевски и капитенот Костадин Захов.
Досегашни победници:
5 – Вардар
4 – Работнички
3 – Македонија ЃП, Силекс, Слога Југомагнат
2 – Пелистер, Тетекс, Шкендија
1 – Академија Пандев, Башкими, Металург, Победа, Ренова, Цементарница 55
Патот до овогодишното финале:
Тиквеш
1. коло: Арсими – Тиквеш 1:2
Осминафинале: Пелистер – Тиквеш 0:1
Четвртфинале: Тиквеш – Брера Струмица 1:1 (6:5 пен.)
Полуфинале: Шкупи – Тиквеш 0:0, 0:0 (3:5 пен.)
Воска Спорт
1. коло: Карбинци – Воска Спорт 0:10
Осминафинале: Воска Спорт – Струга 0:0 (4:1 пен.)
Четвртфинале: Брегалница – Воска Спорт 0:1
Полуфинале: Воска Спорт – Македонија ЃП 2:0, 1:2
