Патниците користат лажни тестови за да патуваат, а цената на негативниот тест се движи од 55 до 165 евра.
Многу авиокомпании бараат негативен тест на COVID-19 пред да им дозволат на патниците да се качат во авион.
Еден човек од Блекбурн во Велика Британија изјави дека неговиот пријател му го позајмил негативниот тест на коронавирус, а тој го ставил неговото име и ја испринтал потврдата. Го искористил лажниот тест за да отпатува во Пакистан бидејќи му требал негативен тест не постар од 96 часа, пишува The Sun.
Тој изјавил дека луѓето го прават ова бидејќи не можат да се тестираат ако немаат симптоми.
Во Бредфорд воведоа тарифа за патниците кои се одлучуваат за патување во последен момент – 150 фунти, додека во Блекбурн се наплаќа 50 фунти.
Друг патник изјави дека му било потребен тест за коронавирус за еден член од семејството. „Разговарав со вработен во една туристичка агенција и тој ми рече дека мојот роднина мора да се тестира, но доколку тестот е позитивен тој ќе ми набави негативен тест за 50 евра“.
Од Владата на Велика Британија велат дека луѓето не треба да ги користат државните ресурси за да се тестираат доколку немаат симптоми туку тоа да го прават во приватни лаборатории.